‘భగవద్గీతా ఫౌండేషన్’ వ్యవస్థాపకులు, గీతా గాన ప్రవచన ప్రచారకర్త, డాII ఎల్ వి గంగాధర శాస్త్రి స్వచ్ఛ రాంశంకరనగర్ (రామంతాపూర్, హైదరాబాద్-) కార్యక్రమం లో (1.2.2024) పాల్గొన్నారు. ఈ సందర్భం గా మొక్కలు నాటి, నిత్యం ప్రజల కు సేవ చేసే జి హెచ్ ఎం సి అధికారులను, పారిశుద్ధ్య కార్మికులను సత్కరించారు. పరిసరాలను పరిశుభ్రం గా ఉంచుకోకపోతే రోగాలు ప్రబలుతాయని తెలిసినా ప్రజలు నిర్లక్ష్యం గా వ్యవహరించడంపై గంగాధర శాస్త్రి ఆవేదన వ్యక్తం చేశారు. చదువుకున్నవారుకూడా నిరక్షరాస్యులాగా, బాధ్యతరహితం గా, సంస్కారహీనం గా ప్రవర్తిస్తూ – తిని వదిలేసిన వ్యర్ధ పదార్ధాలను, చెత్తను, రోడ్ల పై మూటలు కట్టి పడేసి వెళ్లిపోవడాన్ని మున్సిపల్ వారు సీరియస్ గా తీసుకుని, సి సి కెమెరాల ద్వారా వారిని గమనించి కఠినం గా శిక్షించాలని అన్నారు. దశాబ్ద కాలం గా తమ కాలనీ లో చుట్టు పక్కల వాళ్ళు వ్యర్ధ పదార్ధాలను తమ ఇంటి పక్కనే పడవేయడం వల్ల, ఈగలూ దోమలతో తాము తరచూ అనారోగ్యానికి గురవుతున్నామని ఆయన అన్నారు. ఈ విషయం లో ఎన్ని సార్లు అవగాహన కల్పించాలని ప్రయత్నించినా ఫలితం లేకపోయిందని ఆయన అన్నారు. దేవాలయ పరిసరాలను కూడా ప్రజలు శుభ్రం గా ఉంచడం లేదని, వ్యర్ధ పదార్ధాలను మున్సిపల్ వారు ఇంటింటికీ పంపించే వాహనాలకే అందించాలనే కనీస జ్ఞానం కూడా లేని సమాజం లో బతకాల్సి రావడం దురదృష్టకరమని, దీనికి కఠినమైన చర్యలు చేబట్టడమే పరిష్కారమని గంగాధర శాస్త్రి అన్నారు. ఈ సమస్యను పరిష్కరించేందుకు ముందుకు వచ్చిన బి జె పి కార్పొరేటర్ శ్రీమతి శ్రీవాణిని, మున్సిపల్ అధికారులు శ్రీ సుదర్శన్, శ్రీ బాబురావు తదితరులను శ్రీ గంగాధర శాస్త్రి కృతజ్ఞతాభినందనలు తెలియజేస్తూ సత్కరించారు.
‘లౌకికమైనవి చూస్తేనే నమ్మగలం ….ఆధ్యాత్మికమైనవి నమ్మితేనే చూడగలం … పరమాత్మను తెలుసుకోవాలన్నా, దర్శించాలన్నా, ముందు నమ్మకం ఉండాలి… అటుపై అర్హత ఉండాలి… యోగమాయ చేత ఆవరించబడి ఉండడం వల్ల పరమాత్మ కనిపించడు… అనన్యమైన భక్తి చేత మాత్రమే ఈ మాయను దాటి పరమాత్మను చేరవచ్చు. పరమాత్మే పరమ గతి అని నమ్మాలి. మనం చేసే సమస్త కర్మల ఫలితం పరమాత్మదే అని భావించాలి. ఇంద్రియ విషయాలపట్ల ఆసక్తి లేకుండా ఉండాలి. సమస్త ప్రాణుల పట్ల ప్రేమభావం కలిగి ఉండాలి… ఇవే పరమాత్మ అనుగ్రహం పొందాలనుకునే వారికి ఉండాల్సిన ప్రధానమైన అర్హతలు.’ అన్నారు గీతా గాన ప్రవచన ప్రచారకర్త, ‘భగవద్గీతా ఫౌండేషన్’ వ్యవస్థాపకులు డాII ఎల్ వి గంగాధర శాస్త్రి. ‘పిరమిడ్ స్పిరిట్యువల్ సొసైటీ’ వారి ఆధ్వర్యం లో, కడ్తాల్ లో 40 వేలమంది ప్టేక్షకుల సమక్షం లో వైభవంగా జరిగిన ‘పత్రీజీ ధ్యాన మహా యాగం’ కార్యక్రమం లో (24.12.2023) శ్రీ గంగాధర శాస్త్రి గీతా గాన ప్రవచనం చేశారు. ‘ఏపని చేసినా త్రికరణ శుద్ధిగా చేయాలి. ధర్మ బద్ధం గా చెయ్యాలి. స్వార్ధ రహితం గా చెయ్యాలి. లోక హితం కోసం చెయ్యాలి. ఏ పనినైతే ఎంచుకున్నామో ఆ పనికి మనమే చిహ్నమయ్యేట్టు చెయ్యాలి. ఇతరులకు స్ఫూర్తినిచ్చేట్టు చెయ్యాలి. దైవార్పణ బుద్ధి తో చెయ్యాలి. అలా కర్మలను ఆచరించేవాడే మరణాన్ని జయించగలడు. ‘జాతస్య హి ధ్రువో మృత్యుహు.. శ్లోకం అదే చెబుతుంది.. పుట్టిన వానికి మరణము తప్పదు.. అని చెబుతూ నువ్వు శాశ్వతం కాదు అన్న విషయాన్ని గుర్తు చేస్తుంది.. మరణించిన వానికి జన్మము తప్పదు.. అంటూ పునర్జన్మ ఉందన్న విషయాన్ని గుర్తు చేస్తుంది. ఈ జననమరణాల మధ్యలోని జీవిత ప్రయాణాన్ని లోకం గుర్తుపెట్టుకునేలా సాగించాలి.’ అన్నారు గంగాధర శాస్త్రి. నిలకడ లేని చంచలమైన చిత్తం ఏ ఏ విషయాల లో సంచరిస్తుంటుందో, ఆయా విషయాలనుండి దానిని నియంత్రించి ఆత్మయందే స్థిరం గా ఉంచడం కోసం సాధన చెయ్యాలి… ఇదే ధ్యాన యోగం..ఇలా చేయగలిగిన ధ్యాన యోగ సాధకుడే పత్రీజీ …! ధ్యానం గురించి పూర్తి అవగాహన పొందాలంటే భగవద్గీత లో ఆరవ అధ్యాయం “ఆత్మ సంయమ యోగం’ చదవండి’ అన్నారు గంగాధర శాస్త్రి. ‘ఈ ప్రపంచం లో లౌకిక, ఆధ్యాత్మిక విషయాల గురించి సమగ్రం గా చెప్పగలిగే ఒకే ఒక్క దైవ గ్రంథం, వ్యక్తిత్వవికాస గ్రంథం, ధర్మ గ్రంథం, మానవీయ గ్రంథం, మతాలకు అతీతమైన గ్రంథం…..ఒక్క భగవద్గీత మాత్రమే..! దీనిని బాల్య దశనుండే పిల్లలకు నేర్పించి మనదైన సనాతన ధర్మాన్ని కాపాడుకుందాం. అలా కాపాడుకునే ప్రయత్నం బలంగా చేయకపోవడంవల్లే కన్వర్షన్ పేరుతో ఒక మతం, లవ్ జిహాద్ పేరుతో మరో మతం- హిందూ మతాన్ని బలహీనపరచడానికి ప్రయత్నిస్తున్నాయి…”అంటూ హెచ్చరించారు గంగాధర శాస్త్రి. హిందూ ధర్మాన్ని కాపాడుకోవాలని, అందరూ భగవద్గీత చదవాలని సూచించారు. ఘంటసాల, అన్నమయ్య గీతాలను ఆలపించారు. బ్రహ్మమొక్కటే కీర్తన ఆలపిస్తున్నప్పుడు ప్రేక్షకులు ఆనంద నృత్యాలు చేశారు. కొన్ని భగవద్గీత శ్లోకాలను ప్రేక్షకుల చేత చెప్పిస్తూ, భగవద్గీతను చదివి ఆచరిస్తామని వారిచేత ప్రతిజ్ఞ చేయించారు. తనకి సంపూర్ణ భగవద్గీత పాడాలని సూచించింది భారవే అని గంగాధర శాస్త్రి గుర్తుచేసుకున్నారు. చివరన పిరమిడ్ సొసైటీ చైర్మన్ శ్రీ కే విజయభాస్కర రెడ్డి – శ్రీ గంగాధర శాస్త్రి దంపతులను సత్కరించారు.
‘మార్గశిర శుద్ధ ఏకాదశి’ గీతా జయంతి సందర్భం గా ప్రసిద్ధ ఆధ్యాత్మిక సామాజిక సేవా సంస్థ ‘భగవద్గీతా ఫౌండేషన్’ హైదరాబాద్ లోని రామంతపూర్ లో అన్నదాన కార్యక్రమం (24.12.2023) నిర్వహించింది. సంస్థ వ్యవస్థాపకులు డాII ఎల్ వి గంగాధర శాస్త్రి ఈ సందర్భం గా తన కుటుంబ సభ్యులతో పోచమ్మ దేవాలయం లో ప్రత్యేక పూజలు జరిపి, గోసేవ నిర్వహించారు. అనంతరం శ్రీ గంగాధర శాస్త్రి – ఫౌండేషన్ సభ్యులు, ఫౌండేషన్ అడ్వకసి చీఫ్ శ్రీ ఆజాద్ బాబు లతో కలిసి అన్నదాన కార్యక్రమాన్ని నిర్వహించారు.
సియాటెల్, అమెరికా లో నివసిస్తూ ఇన్ఫోసిస్ లో ఉన్నత పదవిలో పనిచేస్తున్న శ్రీ రామ్ నాథ్ సూర్యప్రకాశ్ ఆయన సతీమణి శ్రీమతి నేత్రావతి – గీతా గాన, ప్రవచన, ప్రచారకర్త, భగవద్గీతా ఫౌండేషన్ వ్యవస్థాపకులు డాII ఎల్ వి గంగాధర శాస్త్రి ఆశీస్సులు తీసుకున్నారు. ఫౌండేషన్ కార్యాలయం లో ఆ దంపతులు కాసేపు గడిపారు. సియాటెల్ లో శ్రీ గంగాధర శాస్త్రి గీతా గానప్రవచనాన్ని విని స్ఫూర్తి పొందామని, ఆ స్ఫూర్తి తో తాము ప్రతి రోజూ భగవద్గీతను పఠిస్తున్నామని అన్నారు. ‘భగవద్గీత ను ఏ వయస్సునుండి పఠించాలో గురువు గారు చెబుతూ తల్లి గర్భం లో ఉన్నప్పుడే బిడ్డలకు భగవద్గీత, విష్ణు సహస్రనామం వినిపించాలన్నారు. ఆ మాట నాకు బాగా నచ్చింది. నేను అలాగే చేసేదాన్ని.. మా అమ్మాయికి అలాగే గర్భం లో ఉన్నప్పుడే భగవద్గీత, విష్ణుసహస్రనామం వినిపించాను. అది పుట్టాక ఆధ్యాత్మిక విషయాల పట్ల ఆసక్తి కలిగి ఉండేది. చదువులో చాలా తెలివైనది అయ్యింది. సంస్కారవంతురాలు కూడా.. ఏ సమస్య వచ్చినా తనకు తానే ధైర్యం గా పరిష్కరించుకుంటుంది. ఆధ్యాత్మిక బలం అలాంటిది. గీత లో చెప్పినట్టు సకల ప్రాణులను ప్రేమించగలగాలి. మా దొడ్లో పెంచే మొక్కలను మా బిడ్డల్లాగే చూసుకుంటూంటాను. గురువు గారు గంగాధర శాస్త్రి గారిని మా ఇంటికి ఆహ్వానించినప్పుడు దొడ్లో పెంచిన ఔషధ గుణాలు కలిగిన మొక్కలతో పాటు, కూరగాయల మొక్కల్ని కూడా చూపించాను.” అంటూ శ్రీమతి నేత్రావతి గుర్తు చేసుకున్నారు. రాంనాథ్ సూర్యప్రకాష్, నేత్రావతి దంపతులను శ్రీ గంగాధర శాస్త్రి, విశ్వతేజ లు సత్కరించారు.
‘దాతవ్యమితి యద్దానం దీయతే అనుపకారిణే / దేశే కాలే చ పాత్రే చ తద్దానం సాత్వికం స్మృతమ్ II ( గీత -17-20) దానమిచ్చుట కర్తవ్యమని భావించి దేశ, కాల, పాత్రములనెఱిఁగి ప్రత్యుపకారమునాశింపక చేయుదానము సాత్త్విక దానము… అంటాడు కృష్ణ పరమాత్మ ఇదే ఉత్తమ దానము. మనిషి విధి గా ఆచరించవలసిన మూడు పుణ్య కర్మలలో దానము కూడా ఒకటి. మిగతా రెండు యజ్ఞము, తపస్సు. దాతలు ప్రధానం గా గుర్తించవలసింది పాత్ర ఎరిగి దానం చేయడం. దేవుడు కూడా కోరికను బట్టి ఇవ్వడు. అర్హతను బట్టే ఇస్తాడు. మనమూ అర్హతను బట్టే దానం చెయ్యాలి. శారీరక, మానసిక, ఆర్ధిక దుర్బలులకు, ప్రకృతి వైపరీత్యాలవల్ల దెబ్బతిని కోలుకోలేని వారికి సహాయం చెయ్యండి. ఈ జ్ఞానం కొరవడడం వల్లే ప్రభుత్వాలు ప్రజలకు అవసరం లేని అనేక ఉచితాల ఆశ చూపించి, ఆర్ధిక వ్యవస్థను దెబ్బతీస్తున్నారు. ప్రజలను మానసిక దుర్బలులను, సోమరిపోతులను చేస్తున్నారు. ఉచితం ఎప్పుడూ అనుచితమే.. ఉచితం గా వచ్చేదానికి విలువ ఉండదు. ఏదైనా కష్టపడితే వచ్చే ఫలితానికే విలువ… ఏదైనా ఉచితం గా పొందాలనుకోవడం మానసిక దుర్బలత్వమే…! ఉచితం అంటున్నారంటే అది మరొక చోట ధరలు పెంచి వసూలు చేస్తారని, ఆ భారం పేదల పైనే మరింత పడుతుందని అర్ధం చేసుకోనంతకాలం వ్యవస్థ మారదు.’ అన్నారు ‘భగవద్గీతా ఫౌండేషన్’ వ్యవస్థాపకులు, గీతా గాన ప్రవచన ప్రచారకర్త డాII ఎల్ వి గంగాధర శాస్త్రి…! మాజీ ప్రధాని శ్రీ పి వి నరసింహా రావు సోదరులు, సర్వార్ధ సంక్షేమ సమితి మరియు పి.వి సాహిత్య పీఠం అధ్యక్షులు శ్రీ పివి మనోహరరావు ఆధ్వర్యం లో జరిగిన ( 10.12.2023, పొట్టి శ్రీరాములు తెలుగు విశ్వవిద్యాలయం ఆడిటోరియం, హైదరాబాద్) కార్తీకమాస వనభోజన కార్యక్రమం లో శ్రీ గంగాధర శాస్త్రి గీతా గాన ప్రవచనం చేశారు. “కార్తీక మాసం శివునికి ప్రీతికరమైనదైతే, మార్గశిరం విష్ణువునకు ప్రీతికరమైనది. ఈ ఇద్దరికీ భేదం లేదని ‘గీత’ లో ‘రుద్రాణాం శంకరశ్చాస్మి’ అంటూ మరోసారి స్పష్టం చేసాడు విష్ణు రూపుడైన కృష్ణపరమాత్మ…దీన్ని దృష్టిలో ఉంచుకుని శ్రీ పి వి మనోహరరావు గారు నాచేత కార్తీక మాసం లో గీతా ప్రవచనం చెప్పించడం సముచితం గా ఉందని భావిస్తున్నాను. భగవద్గీతను జీవన గీత గా గుర్తెరిగి అధ్యయనం చేస్తే ఉత్తమ జీవితం గడపడం ఎలాగో అర్థమవుతుంది. అప్పుడే జన్మ సార్ధకమవుతుంది. భగవద్గీత వృధాప్యపు కాలక్షేపం కాదు. కేవలం పఠనా గ్రంథమూ కాదు. అధ్యయన గ్రంథం.. ఆచరణ గ్రంథం..! కాబట్టి గీత నేర్చుకుందాం.. రాత మార్చుకుందాo… ఇంటింటా గీతా జ్యోతుల్ని వెలిగిద్దాం… బాల్యదశ నుండే మన పిల్లలకు భగవద్గీతను నేర్పించడం ద్వారా సనాతన ధర్మ రక్షకులమవుదాం. స్వార్ధరహిత ఉత్తమ సమాజాన్ని నిర్మిద్దాం…” అన్నారు గంగాధర శాస్త్రి. అనంతరం శ్రీ పివి మనోహర రావు, ఈ కార్యక్రమానికి ముఖ్య అతిథులు గా విచ్చేసిన బ్రహ్మశ్రీ మాడుగుల నాగఫణి శర్మ, బ్రహ్మశ్రీ వి ఎస్ ఆర్ మూర్తి, ఆంధ్రప్రదేశ్ తెలుగు భాషా సంఘం అధ్యక్షులు శ్రీ విజయ బాబు తదితరులు గంగాధర శాస్త్రి ని సత్కరించారు.
అమెరికా, కాన్సస్ సిటి లోని ‘సాయ్ కాన్ సొల్యూషన్స్’ గ్లోబల్ క్లయింట్ పార్టనర్ శ్రీ రాజ్ చెరుకుముడి తన బృందం తో హైదరాబాద్ లోని ‘భగవద్గీతా ఫౌండేషన్’ ని సందర్శించారు.’భగవద్గీతా ఫౌండేషన్’ వ్యవస్థాపకులు, గీతా గాన ప్రవచన ప్రచారకర్త డాII ఎల్ వి గంగాధర శాస్త్రి, అడ్వకసి ఛీఫ్ శ్రీ అజాద్ ఆయనకు స్వాగతం పలికి భగవద్గీతా గ్రంథం బహూకరించి సత్కరించారు. ఫౌండేషన్ తలపెట్టిన కార్యక్రమాల గురించి రాజ్ వివరంగా తెలుసుకుని, గీతా ప్రచారం లో తానూ భాగస్వామ్యం వహిస్తానన్నారు.
‘నాకు గాయకుడు గా స్ఫూర్తినిచ్చింది, అవకాశాలు తెచ్చిపెట్టింది, గుర్తిపుతెచ్చింది, గౌరవం సంపాదించిపెట్టింది, భాషా సంస్కారం నేర్పింది, సినినేపధ్య గాయకుడుగా అవకాశం కల్పించింది, చివరకు నా జీవితానికి అర్ధం, పరమార్ధం చెప్పి సంపూర్ణ భగవద్గీతా గానం ద్వారా శాశ్వతత్వాన్ని ప్రసాదించింది … ఘంటసాల పాటే..! ఆ పాట మాధుర్యాన్ని నాకు బాల్యం లో రుచి చూపించిన మా తండ్రి గారు శ్రీ కాశీవిశ్వనాధ శర్మ గారికే ఈ అవార్డు అంకితం … !’ అన్నారు ప్రసిద్ధ గాయకులు, గీతా గాన, ప్రవచన, ప్రచార కర్త డాII ఎల్ వి గంగాధర శాస్త్రి. ‘గోవింద గీతికలు’ సంస్థ శ్రీ గంగాధర శాస్త్రి ని ‘ఘంటసాల – జీవిత కాల సాఫల్య పురస్కారం’ తో సత్కరించిన సందర్భం గా ( పొట్టిశ్రీరాములు తెలుగు విశ్వవిద్యాలయం, హైదరాబాద్ (24.1.2023) ఆయన గాన ప్రసంగం చేశారు. ఘంటసాల పాట లో ఉన్న మాధుర్యం ఆర్ద్రత, పవిత్రత, పరమ శాంతి తన హృదయం పై బాల్యం లో చెరగని ముద్ర వేసిందని గంగాధర శాస్త్రి అన్నారు. ఘంటసాల భగవద్గీత గానం చేసి ఉండకపోతే తాను దానిని సంపూర్ణం గా గానం చేయాలనే ఆలోచన వచ్చి ఉండేది కాదని, ఘంటసాల పాటలు తేలిగ్గా రావని, సాధన చేయడం వల్లే వస్తాయని, తెలుగు పద్యాలు, సంస్కృత శ్లోకాలు, దండకాలు పిల్లలకు నేర్పాలంటే ఘంటసాల గాత్రాన్ని రుచి చూపించాలని అన్నారు. అలాగే ఇదే వేదికపై ‘నటసామ్రాట్ ఏ ఎన్నార్ శతజయంతి సిల్వర్ క్రౌన్’ పురస్కారాన్ని ప్రముఖ సినీ హీరో శ్రీ సుమన్ అందుకున్నారు. హీరో గా, దేముడి గా, విలన్ గా, క్యారెక్టర్ ఆర్టిస్ట్ గా విలక్షణమైన పాత్రలు పోషించి మెప్పించిన నటుడు శ్రీ సుమన్ అని గంగాధర శాస్త్రి చెబుతూ తాను జర్నలిస్ట్ గ ఉన్న రోజులనుంచి ఆయనతో ఉన్న అనుబంధాన్ని గుర్తుచేసుకున్నారు. తమను సత్కరించిన ‘గోవింద గీతికలు’ సంస్థ వ్యవస్థాపక కార్యదర్శి శ్రీమతి గీతకు కృతజ్ఞతలు తెలియజేసారు. ‘కళ’ పత్రిక సంపాదకులు శ్రీ మహ్మద్ రఫీ ఈ కార్యక్రమానికి అధ్యక్షత వహించారు.
‘క్షుద్రం హృదయ దౌర్బల్యం త్యక్త్వోత్తిష్ఠ పరన్తప … అంటాడు శ్రీకృష్ణ పరమాత్మ ..! అంటే – మానసిక దౌర్బల్యాన్ని నీచమైనది గా చెబుతూ దాన్ని విడిచిపెట్టి నీ కర్తవ్యాన్ని ధర్మబద్ధం గా ఆచరిస్తే అంతటా విజయమే..! భగవద్గీతను జీవితకాలం లో సర్వావస్థల్లో చదివి అర్ధం చేసుకోగలిగితే స్వార్ధ రహిత ఉత్తమ సమాజాన్ని నిర్మించవచ్చు. మానసిక దౌర్బల్యం అనేక రూపాలలో పట్టి పీడిస్తుంది. ఎలక్షన్స్ దగ్గరపడుతుండగా మద్యం, డబ్బు, ఉచితాలు, పధకాల పేరుతొ సామాన్యుణ్ణి ప్రలోభపెడితే పదవిలోకి రావచ్చు. అనేది రాజకీయ నాయకుల మానసిక దౌర్బల్యమైతే.. ఆ పంచిపెట్టేది మన డబ్బే కదా… తీసుకుంటే తప్పేంటి ? అనేది సామాన్యుడి లాజికల్ మానసిక దౌర్బల్యం ..! డబ్బు మనదే.. కానీ ఇస్తున్నది ఏ రూపం లో అన్నది ముఖ్యం… ఇదీ ఒకరకం గా ‘ఓటుకి నోటు’ పథకమే.. దురదృష్టం ఏమిటంటే ఈ సామాన్యుడే ప్రభుత్వాలను నిర్ణయించేది. మనం ఏది ఆలోచించినా, ఏ నిర్ణయం తీసుకున్నా దాని ప్రభావం కుటుంబం మీద, సమాజం మీద, రాష్ట్ర అభివృద్ధి మీద, దేశ భవిష్యత్తు మీద ఆధారపడి ఉంటుందని గుర్తుంచుకోవాలి. ఈ సందర్భం లోనే ‘ధర్మo’ అనేది గుర్తుకు రావాలి.. భగవద్గీతా బోధన పేరుతో ప్రతి ఒక్కరికీ ధర్మమార్గం అంటే ఏమిటో, హిందూయిజం గొప్పతనమేమిటో చెబుతూ ప్రజలను చైతన్యపరచాలి. కష్టం తో సంపాదించేదానికే విలువుంటుంది. ఉచితానికి విలువలేదు. ఇచ్చేవాడికీ తీసుకునే వాడికీ ఇద్దరికీ అగౌరవమే.. శారీరక, మానసిక, ఆర్ధిక, ప్రకృతి వైపరీత్యాలవల్ల దుర్బలులైన వారికే దానం చెయ్యాలి. ఇదే పాత్ర ఎరిగి దానం అంటారు. గీత లో ‘దాతవ్యమితి యద్దానం దీయతే అనుపకారిణే..’ శ్లోకం ఈ విషయమే చెబుతుంది.. నైతిక విలువలను పెంపొందించడానికి భగవద్గీత కంటే మించిన జీవిత పాఠం మరొకటి లేదు. దీనిని బాల్యదశ నుండే పిల్లలకు నేర్పించండి.” అన్నారు ప్రసిద్ధ ఆధ్యాత్మిక గాయకులు, గీతా గాన ప్రవచన, ప్రచార కర్త, భగవద్గీతా ఫౌండేషన్ వ్యవస్థాపకులు డాII ఎల్ వి గంగాధర శాస్త్రి. సంగారెడ్డి జిల్లా లోని నారాయణ్ ఖేడ్ గ్రామం లో ప్రసిద్ధ యజుర్వేద పండితులు బ్రహ్మశ్రీ యలమంచి మోహన్ జోషి ఘనం గా నిర్వహించిన ‘మహారుద్ర సహిత శత చండీ యాగ పురస్సర చతుర్వేద స్వాహాకార సుదర్శన మహా యాగ ఉత్సవం’ సందర్భం గా మూడవ రోజున గంగాధర శాస్త్రి గీతా వైభవాన్ని గానసహితం గా వివరించారు. ‘శివునికి ప్రీతికరమైన ఈ కార్తీక మాసం లో విష్ణురూపుడైన శ్రీ కృష్ణుని గీతను చెప్పించడాన్ని శివకేశవులకు అభేదాన్ని చెప్పడమే’ అని గంగాధర శాస్త్రి అన్నారు. కర్మ ఫలాన్ని పరమాత్మకు అర్పిస్తూ, అనన్య భక్తి తో ఆరాధించడం వల్లే పరమాత్మ అనుగ్రహం లభిస్తుందని అన్నారు. తల్లి తండ్రులు పిల్లలతో వీలైనంత సమయం గడపాలనీ, శ్రీరామాయణ, భారత, భాగవత, భగవద్గీతల వంటి మన ఆధ్యాత్మిక సంపద గురించిన అవగాహన కల్పించాలని గంగాధర శాస్త్రి కోరారు. తన సమక్షం లో భగవద్గీతా శ్లోక పఠనం చేసిన చిన్నారులను గంగాధర శాస్త్రి అభినందించి ఆశీర్వదించారు. లోక క్షేమాన్ని కాంక్షిస్తూ ఈ యాగాలను శాస్త్రోక్తం గా నిర్వహిస్తున్న బ్రహ్మశ్రీ మోహన్ జోషి కి హృదయపూర్వకo గా నమస్సులందిస్తూ అభినందించారు. చివరిగా భక్తులతో శ్రీ గంగాధర శాస్త్రి చేయించిన కృష్ణ భజన తో ‘మా ఫంక్షన్ హాల్’ భక్తి తరంగాలతో నిండిపోయింది. కార్యక్రమ అనంతరం గంగాధర శాస్త్రి మార్వాడి గల్లీ లోని 200 ఏళ్ల క్రిందటి రాధాకృష్ణ మందిరాన్ని దర్శించారు. ఈ మందిర నిర్వాహకులు
శ్రీ నందకిషోర్ భంగ్ గంగాధర శాస్త్రి కి స్వాగతం పలికి రాధాకృష్ణ చిత్రాన్ని ఆవిష్కరింపజేసి అటుపై తాము నిర్వహిస్తున్న గోశాలను చూపించారు. ఈ సందర్భం గా రావి ఆకు పైన శ్రీ గంగాధర శాస్త్రి చిత్రాన్ని చిత్రించిన పటాన్ని శ్రీ సంతోష్ కుమార్ బహూకరించారు.
ఆయన పేరు డాక్టర్ అజీమి …. ప్రపంచ ప్రసిద్ధి గాంచిన హృద్రోగ నిపుణులు ( Cardio Vascular Specialist )..! ప్రస్తుతం అమెరికా లోని శాండియాగో లో ‘SHARP HEALTHCARE’ ద్వారా సేవలందిస్తున్నారు. తన 12 ఏళ్ల వయసులో ఆఫ్ఘనిస్తాన్ నుండి శరణార్థి గా అమెరికా కి వచ్చి స్థిరపడి స్వయం కృషి తో ప్రసిద్ధ హృద్రోగ నిపుణుడి గా ఎదిగిన డాII నస్సీర్ అజీమీ ఇటీవల ఒకరోజు …. ( ఆగష్టు 13,2023 ) ప్రసిద్ధ గాయకులు, గీతా గాన, ప్రవచన, ప్రచార కర్త డాII ఎల్ వి గంగాధర శాస్త్రి ని శాండియాగో ( కాలిఫోర్నియా-అమెరికా) లోని ఒక కాఫీ డే లో చూడడం తటస్థించింది. ఆ సమయం లో గంగాధర శాస్త్రి తో పాటు అప్పటి ‘గీతా ఫౌండేషన్’ అధ్యక్షులు, ప్రముఖ Anaesthetist డాII రాధాకృష్ణ తమిరిసా, గంగాధర శాస్త్రి అభిమాని శ్రీ ప్రవీణ్ పురాణం ఉన్నారు. ఈలోగా తన తన సహచర వైద్యులు డా II అజీమి, మరొక phisician ఆష్ కాస్తో లను గమనించిన డాII రాధాకృష్ణ (ఈ ముగ్గురూ ఒకే ఆసుపత్రిలో సేవలందిస్తున్నారు) శ్రీ గంగాధర శాస్త్రి ని తన గురువు గా పరిచయం చేశారు. కాసేపు గంగాధర శాస్త్రి తో మాట్లాడిన ప్రభావం తో .. ‘మీ నుంచి నా ఛానల్ కి భారతీయ ఆధ్యాత్మికత పైన ఒక ఇంటర్వ్యూ ఆశిస్తున్నాను..’ అని కోరారు డాII అజీమి…! ఆ మరురోజే ప్యాలస్ ను తలపించే అజీమి స్వగృహం లో ఇంటర్వ్యూ జరిగింది. కృష్ణ ప్రార్ధనా శ్లోక గానం తో ప్రారంభించిన శ్రీ గంగాధర శాస్త్రి – హిందూయిజం పైన, భగవద్గీత పైన అజీమి అడిగిన అనేక ప్రశ్నలకు సంతృప్తి కరమైన సమాధానాలిచ్చారు.” భగవద్గీత – మతాలు ఆవిర్భవించని కాలం లో ప్రపంచం లోని ప్రతి మానవుడినీ ఉద్దేశించి బోధించబడిన ఉత్తమ జీవన విధాన మార్గదర్శిని.. ఇది మతం కాదు ధర్మం .. మతం అంటే ఒక వర్గానికి సంబంధించింది. ధర్మం అంటే సార్వజనీనమైనది. అందుకే పాశ్చాత్యులకు సైతం గీత స్ఫూర్తినిచ్చింది. అమెరికా లోని న్యూజెర్సీ లో ఉన్న శాటన్ హాల్ యూనివర్సిటీ లో MBA విద్యార్థులకు A JOURNEY OF TRANSFERMATION పేరుతో గీతను బోధిస్తున్నారు. గీత కర్మ సిద్ధాంతాన్ని ప్రతిపాదిస్తుంది. నువ్వు చేసే కర్మను బట్టి ఫలితం ఉంటుంది. తదుపరి జన్మ కూడా ఈ జన్మలో చేసిన కర్మ ను బట్టి ఉంటుంది.. ఏ పని చేసినా ధర్మబద్ధం గా, త్రికరణ శుద్ధి గా, నీ చేతుల్లోలేని ఫలితాన్ని – దైవానికి వదిలిపెట్టి , భవబంధాలకు అతీతంగా, నిస్వార్ధ బుద్ధితో, లోక శ్రేయస్సు కోసం చెయ్యాలని గీత చెబుతుంది. ‘ప్రాణులంతా ఒక్కటే.. ప్రాణులందరికీ ఒక్కడే..’ అన్నది గీతా సారాంశం .. భారతదేశం అన్నిమతాలనూ గౌరవించడానికి కారణం ‘గీత’ భావజాలమే… గీత సర్వ ప్రాణులనూ సమదృష్టి తో చూడమని చెబుతుంది. ఇది మానవీయ గ్రంథం .. సిద్ధాంత గ్రంథం.. గీత విషయం లో ఎవరికి ఏ సందేహం వచ్చినా వివరణాత్మకం గా, అందరికీ అంగీకారయోగ్యం గా సమాధానం చెప్పవచ్చు. ప్రపంచం లో ఇతర గ్రంథాలు దైవ దూతలు, దైవ కుమారులు గా ప్రకటించుకున్న వారి చేత చెప్పబడితే… భగవద్గీత – తానే దైవం గా ప్రకటించుకుని, అందుకు నిదర్శనం గా విశ్వరూపాన్ని దర్శింపజేసిన కృష్ణ పరమాత్మ చేత బోధించబడింది. మానవ జీవితానికి సంబంధించిన అన్ని విషయాలూ ఇందులో చర్చించబడ్డాయి. భగవద్గీత – దేశ, కాల, జాత్యాదులకు, వయో వర్గ లింగ విభేదాలకు అతీతమైన ‘కాలం చెల్లని’ ఒకే ఒక్క దైవ గ్రంథం..గీతా పఠనం, ఆచరణ మానసిక వత్తిడిని దూరం చేసి ఇతరులకు స్పూర్తిని అందించే లక్ష్యానికి చేరుస్తుంది. ప్రపంచం లో ని అన్ని మతాలూ జీవన విధాన మార్గాలే… కానీ హిందూమతం మాత్రం సర్వజనమోదయోగ్యమైన ఉత్తమజీవన విధాన మార్గం.” అంటూ అనేక విషయాలను సహేతుకం గా వివరించారు శ్రీ గంగాధర శాస్త్రి. ‘శాస్త్రీ జీ’ అంటూ ఇంటర్వ్యూ ప్రారంభించిన డాII అజీమి – ఇంటర్వ్యూ పూర్తి అయ్యే సమయానికి ..’You are my Guruji..!’ అంటూ గంగాధర శాస్త్రి కి తన భార్యా పిల్లలను పరిచయం చేసి ఆశీస్సులు అందుకున్నారు. ఈ ఇంటర్వ్యూ తో హిందూయిజం భావజాలం పైన తన గౌరవం వెయ్యి రెట్లు పెరిగిందని, తదుపరి అమెరికా పర్యటనలో తమ సంస్థ లో పనిచేసే డాక్టర్స్ మిత్రులకు గీతా సందేశం అందించాలని అజీమీ గంగాధర శాస్త్రి ని కోరారు. మానవత్వం సేవా విశ్వరూపం ప్రదర్శించాల్సిన కరోనా సమయంలో అన్ని వ్యవస్థలూ పతనావస్థకు చేరుకోగా మెడికల్ వ్యవస్థలు, సంస్థలు, ఆసుపత్రులు మాత్రం ఈ అవకాశాన్ని వ్యాపారం గా మార్చుకోవడం అమానుషమని, దీనికి కారణం మానవీయతను పెంపొందించే ఆధ్యాత్మిక పునాది లేకపోవడమేనననీ అన్న గంగాధర శాస్త్రి అభిప్రాయం తో డాII అజీమి ఏకీభవించారు. అయితే ప్రాణాలకు తెగించి డాక్టర్లు చేసిన సేవలకు మాత్రం సకల మానవాళి ఎంత కృతజ్ఞతలు తెలియజేసినా తక్కువే అని గంగాధర శాస్త్రి అన్నారు. గంగాధర శాస్త్రి తో డా ఆష్ కాస్తో (క్రిస్టియన్) డా నస్సిర్ అజీమి (ముస్లిం) ఫోటో దిగినప్పుడు ‘Now we’ll be called as RAM -ROBERT- RAHIM’ అంటూ చమత్కరించారు గంగాధర శాస్త్రి.
